Молитва 1

Всемогущий, Превечный Боже, Отче милосердия, призри молимтися на наша повседневныя требования, и жатву довольную нашему жития изобильне даруй. Возвеличи над нами имя Твое святое, и на поля, винограды, вертограды наша, излий преизобильное Твое благословение, да вся труды рабов Твоих, древа, и насаждения наша, полно плодоносят. Отврати, Милосерде Боже, от кончин наших, небеса неприязненна, студени волны, грады, дожди вредящие, множества вод, и вся зла, яже могут человеческая вредити требования. Яко Ты если Бог наш, и Тебе славу возсылаем, Отцу, и Сыну, и Святому Духу, ныне и присно, и во веки веков, аминь.

Молитва 2

Всемогущий Боже, милосердие Твое призываем, да сия семена, иже воздухом и дождем воспитати благоволил еси, благословением Твоим возливши. Подаждь, Владыко, людем Твоим, Тебе всегда о Твоих благодарити дарованиих, от неплодствия же земли, душы алчущых отврати, да нищ и богат, недужный и крепкий, славят имя Твое: Отца, и Сына, и Святаго Духа, ныне и присно, и во веки веков, аминь.

На благословение семян:

Да благословит ны Бог, Бог наш, и земли нашей всеплодие подаст, и сторицею растити творит плоды ея, да пришедше с радостию, рукояти наша с благодарением соберем: о Христе Иисусе Господе нашем, Емуже подобает всякая слава, честь, и поклонение, со Безначальным Его Отцем, и Пресвятым, Благим и Животворящим Духом: ныне и присно, и во веки веков, аминь.

Молитва 3

Владыко Святый, Отче Всемогущий, Превечный Боже, молимтися усердно, да мановением милосердия Твоего, дати нам изволиши жатвы множество, плодов изобилие, древес овощей, и прибытки всяких вещей, и от всех сих, волнения небес губительная, студени и грады отврати. Яко подобает Тебе всякая слава, честь, и поклонение: Отцу, и Сыну, и Святому Духу: ныне и присно, и во веки веков, аминь.

Молитва 4

Благослови, Господи, землю сию, да дасть плод благ во время свое, ни кийже дух волнений вредити ю возможет, над неюже призвано есть имя Твое святое, аминь.

Молитва 5

Владыко, Иисусе Христе, Сыне Бога Живаго, низпосли святаго Ангела Твоего с небес, да сохранит жатвы, семена, и плоды наша, от дождей волненных, от молний, от вреждения птиц, от съядения мышей, от червий угрызения, и от всех напастей диавольских: да сохранит хранилом своим движения наша, и будет стена огненна окрест их. Благословением своим ангельским да благословит и умножит семена наша, да благословим имя Твое святое: Отца, и Сына, и Святаго Духа, ныне и присно, и во веки веков, аминь.

Молитва 6

Всемогущий, Превечный Боже, от ничегоже мир сотворенный висящ содержай, и в житие рода человеческаго поля делати повелеваяй: усердно прибегаем к милосердию Твоему, да еже на сих полех и виноградех, здраваго семене всеянно, или насажденно есть, возрением благоутробия Твоего благословиши, и воздуха мерность подадеши, и искоренивше колчков и терния нечистоту, семена плодовита покажеши, по мере же часа совершенне дорасти дадеши, да мы раби Твои дарами Твоими созрелыми, насыщени, Тебе достойныя славы возсылати возможем: всегда ныне и присно, и во веки веков, аминь.

Да благословит вы семена Бог Отец, да благословит вы Бог Сын, да благословит вы Бог Дух Святый, растите, и множитеся, и исполняйте житницы и храмы наша, в честь Всемогущаго Бога, и всех святых, аминь.

Молитва 7

Творче всех Боже, иже Моисею рабу Твоему рекий: глаголи сыном Израилевым, егда внидете в землю, юже аз дам вам, и пожнете жатву ея, принесете новые снопы жатвы вашея к жрецу, и он принесет сноп пред Господем приятен вам: просим неизмеримую благость Твою, да сия семена, зелия, злаки, благословити, сохранити, и к дорастлости привести изволиши: да первенства их, Тебе, Твоим же иереем, и нищим дати, пищу же нам, и скотом нашим потребную, от сих имети возможем, Тобою питателем нашим: Емуже подобает всякая слава, честь, и поклонение, со Отцем Безначальным, и с Пресвятым, Благим и Животворящим Духом, ныне и присно, и во веки веков, аминь.

Молитва 8

Владыко, Святый Отче, небо создавый и землю, и непрестанно има владеяй, и Своим прозрением сохраняяй: смиренно тя просим, и молимтися, да Твоею несравненною благостию, сия поля, древа, семена, и пустыны, благословити, и им плодоношение подати изволиши, о еже нам рабом, и рабыням твоим, ко живопитанию, и утешению телес, и духовной пищи душ, оттоле жительствовати, и верно служити тебе, Отцу, и Сыну, и Святому Духу, ныне и присно, и во веки веков, аминь.